Texty: Mauro Ermanno Giovanardi. Cuore A Nudo. El Mè Gatt.

El me gatt
A l'han trovaa distes in mezz a i orti
i oeucc a eren ross e un poo sversaa
me piasaria save chi l'e quel ostia
che al me gatt la panscia al g'ha sbusaa.

L'era insci bell, insci simpatich
negher e bianch, propri on belee
se ciapi quel che l'ha copaa
mi a pesciaa ghe s'ceppi 'l dedree.

I amis m'han dit «L'e stada la Ninetta
quella cont la gambetta sifolina
l'emm vista in mezz a i orti ier matina
che la lumava 'l gatt cont on cortel».

L'e malmostosa, de bruta cera,
e l'ha g'ha on nas svisser e gross
vedella in gir fa propi pena
e tucc i fioeu ghe dann adoss.

Incoeu a l'hoo spetada in via Savona
dopo mezzdi, quand lee la torna a ca
ghe sont rivaa adree a la barbona
e su la gamba giusta gio legnat.

Hoo sentu on crach de ossa rott
l'e 'ndada in terra come on fagott
lee la vosava «oi mamma mia»
me sont stremi, sont scapaa via.

Stasera voo a dormi al riformatori
in quel di Filangieri al numer duu
m'han daa del teddy-boy, del brutt demoni
mi sont convint istess d'avegh reson.

Se g'hoo de divv, o brava gent
de la Ninetta me frega nient
l'e la giustissia che me fa tort
Ninetta e viva, ma el gatt l'e mort,
l'e la giustissia che me fa tort
Ninetta e viva, ma el gatt l'e mort.